近年有唔少既同學, 都選擇上去大陸讀書, 我亦都係其中之一, 我覺得好多同學同家長, 響選擇大陸升學既時候, 都唔會有好多資料參考, 我響上年亦響呢度答過一d同學問題, 我希望今年主動d去介紹一下
我剛剛睇過學友社出版既到中國大陸升學既手冊, 內容算係近一兩年黎最詳細既一份, 但始終有唔少內容, 都唔係交代得十分清楚吧 所以我想用過來人身份, 向大家介紹一下大陸升學既發展
首先我介紹自己先啦, 我而家係暨南大學2年級學生, 2年前a-level成績唔係咁好下, 但又付合暨大既入學資格, 就咁入左暨大讀書既, 不過就算係唔符合入學要求, 暨大都有華文學院, 可以讓中五至中七既同學入讀, 但聽講因為課程要求比較低, 接近會考程度, 所以學習風氣聽講比較差下. 而且華文學院唔係響廣州本部入面, 自成一國 所以同本部無乜關係. 如果唔係成績差得好緊要既話, 都應該會上到黎讀degree既
暨南大學響中國大學排名約在50-60附近, 響廣東省排名第三, 響中山大學同華南理工之後, 情況有d似香港既Poly, 比上不足, 比下有餘啦, 出名既科目主要係經濟, 新聞等科目, 同埋生物, 仲有一個國際學院, 係用英文教學既, 亦吸引唔少大陸成績好既同學入讀, 學校公佈既數據就話招收到廣東省高考成績最好既頭17%學生, 但呢個係內地學生既數字, 招收港澳台華僑學生(俗稱外招生)既要求其實比較低, 一般都一定收, 無論成績好壞既, 所以有時會覺得內外招生既學習風氣有頗大差別
由於暨大響2006年會慶祝百年校慶, 所以廣州本部既建築工程一直無點停過, 而且暨大既佔地唔大, 又多教工宿舍, 所以學習同生活場地一直不足, 所以響2002年入學既學生, 都要響珠海學院住一年, 聽講下年仍然要響珠海住一年. 珠海既環境比廣州好得多 而且教學設施同配套設施都比本部新, 缺點就係少活動, 比較悶, 但亦可以培養到同學既學習風氣, 本部老師話過我地呢派從珠海返黎既同學, 無其他一直響廣州讀既師兄姐咁易學壞喎, 但因為唔少老師都要由廣州本部到珠海上課, 對老師黎講會比較辛苦, 所以有d老師都唔係咁想過去教, 特別係理科同學響珠海無實驗課 對課程影響其實唔小
教學方面 就一定用普通話啦, 第一個學期會有漢語班既, 但作用有限, 所以一定要有少少基礎. 老師方面大部份都聽得明廣東話既, 但少聽到老師主動講(廣東既老師例外), 同埋會有1-2科係由英文教既, 老師既英文水平唔差, 可以用英文問問題既, 但教就會有d困難, 我讀既系有幾個老師都曾經響美國有名大學教過, 亦有d博士研究生將會到美國同德國既大學做研究, 水平其實好高下. 學校圖書館剛拆左, d書分散到唔同既小圖書館, 參考同溫習方面比以前難左 但學校課室響無堂時仍然開放比同學自修
生活方面, 好可能係同學最難適應既地方, 其實香港同內地既生活水平仲係差好遠, 響呢方面真係唔好成日同香港比較, 因為大陸改革開放先二十幾年, 話就話比起十幾年前先進好多, 但真係唔可以同香港比較, 比較亦十分無謂. 好多生活上既軟件硬件配套 都仲停留響計劃經濟 大鑊飯階段, 但如果係想多d了解大陸生活, 特別係其他非大城市既生活, 好多都同大學入面分別不大, 如果你連大學入面都忍受唔到既話, 內地唔少仍未完全發展既地方會更難受
同內地學生既關係, 唔知點解總係有d隔膜, 學校政策係有d學科會內外招生唔同班上課既. 內地學生會十分勤奮去讀書, 相對而言港澳學生會較不用功 特別係一d港澳學生較多既學科, 同內地學生不但沒有交流, 更聽講會互相歧視, 但我讀的科目因為學生人數不多, 與內地同學會多點交流, 而且我有機會參與不少學校的活動, 如學生會和其他學會活動, 認識到很多內地同學, 更覺內地學生真的都是臥虎藏龍, 但就缺乏創意和團隊合作經驗, 他們都會很關心學業, 比較少活動. 而相對起黎, 因為內地消費水平較香港低, 所以香港學生會覺得錢十分好使, 會多d消費娛樂, 但都有d似內地同學咁努力既
最後我想提出一個十分重要既point, 就係響大陸發展既機會, 呢個係普遍香港同學和家長, 甚至係老師都有被誤導既地方. 內地因為響98年開始擴大大學既入學比率, 所以自01年起, 有大量既學士畢業生流入勞動市場, 但內地既經濟發展追唔上大學畢業生既上升, 所以有唔少既畢業生比而家香港既大學畢業生更徬徨, 加上由其他省份前來廣東, 江蘇, 上海及北京等經濟較好的省市, 每年既大型招聘會比香港的更轟動, 場面比香港的更大和混亂, 所以內地有唔少大學畢業生都會考研究生, 比率仲每年一直上升, 我讀既系有接近4成師兄姐考研究生, 所以得到個degree絕對唔能夠同內地同學競爭
雖然我提出唔少point係內地升學既缺點, 但我仍然會鼓勵想北上既同學黎內地讀書, 因為而家普遍既外地升學熱門地方 環境條件都比香港好或同香港差不多, 但我覺得香港學生係要多d鍛鍊自己, 內地係一個好好既地方比學生鍛鍊, 你會見到自己既不足, 你會明白香港真係一個天堂同溫室, 你會響受到挫折後, 懂得怎去爬起來, 仲有, 你會認識到好多人同事, 係響香港好難學到!
轉貼: 暨南大學2年級學生
版主: 社員
